YouTube Marketing

Description

आपण हे पुस्तक विकत घेतलतं याचाच अर्थ आपल्याला व्यवसाय करण्याची तीव्र ईच्छा आहे, आपल्या मनात व्यवसायच बीज हळूहळू रुजत चालल आहे, हे दिसून येत. या उद्योग जगतात आपलं हार्दिक-हार्दिक स्वागत आणि मन:पूर्वक अभिनंदन. व्यवसाय आज म्हटलं की लगेच उद्या सुरू होत नाही. जिद्द, चिकाटी व मेहनत या त्रिसूत्रांची व्यवसायात तग धरून राहण्यासाठी नितांत आवश्यकता असते. कष्ट घेण्यासाठी मनाची पूर्ण तयारी करावी लागते. तुम्ही व्यवसाय करण्याचा निर्धार केलाच आहे, तर मग आता मागे वळून पाहू नका. आपण व्यवसाय करायचेच हि जिद्द ठेऊनच रणांगणात उतरा, एकदा रणांगणात उतरलात की डावपेच कसे आखायचे, कोणत्या वेळी कोणते पाऊल उचलावे, कसे उचलावे, हे तुम्ही शिकता. ते डावपेच कसे खेळायचे ही परिस्थिती त्यावेळी तुम्हाला शिकवते. एकदा डावपेच खेळायला शिकलात की, यश आपलेच आहे, यावर विश्वास ठेवा. एकदा व्यवसायात गुंतलात की नोकरी करायच विसरून जाल, कारण व्यवसायात आपल्या हातात सतत पैसा खेळत राहतो.   

          मी हे पुस्तक माझ्या नऊ वर्षांच्या अनुभवातून आणि आलेल्या प्रसंगातून लिहिले आहे. मला लिखाणाची फार आवड होती. मी लहान मुलांना छोट्या-छोट्या  गोष्टी, नाटके, एकांकिका लिहून देत असे आणि त्यांच्या त्या नाटकांना मीच दिग्दर्शन करत असे. ती लहान मुले त्यांच्या शाळेत हे नाटक किंवा एकांकिका सादर करत, आणि छान झाल्याच मला सांगत. आपलं लिखाण चांगलं आहे याचं मला अभिमान वाटे. मी कथा लिहित असे. चित्रपटांच्या कथा लिहित असे. एकदा माझ्या आजोबांनी सांगितलेली “चतुर धोंडया” ही गोष्ट “सामना” या वृत्तपत्रात छापून आणली होती. घरात, आजूबाजूला व मित्रांमध्ये माझं कौतुक झाल. मी “उपाशी वऱ्हाडी” हे मराठी नाटक १९९५ मध्ये लिहिले होते. या नाटकाचे दोन प्रयोग डिसेंबर १९९६ आणि जानेवारी १९९७ रोजी अनुक्रमे शिवाजी मंदिर व दामोदर हॉल या नाटयगृहात सादर केले. या नाटकात दोन तीन कलाकार सोडले तर बाकी सगळे आमच्याच घरचे होते. या नाटकात प्रमुख भूमिका करणाऱ्या हिरोची आई सापडत नव्हती. माझ्या मित्रांनी माझ्या पत्नीला आईची  भुमिका  करण्याची विनंती केली. माझी पत्नी त्यावेळी गरोदर असताना देखील ही जबाबदारी तिने आनंदाने स्विकारली. तिने सादर केलेल्या कलेला माझ्याकडे शब्दच नव्हते. लोकांचा या नाटकाला उस्फुर्त प्रतिसाद मिळाला. माझ्या लिखाणाला नेहमीच लोकांनी दाद दिली आहे.

          बऱ्याच नवीन व्यावसायिकांना व्यवसाय करण्याची फार मोठी ईच्छा असते. पण व्यवसाय कसा करावा आणि वाढवावा याची माहिती त्यांना नसते. आता व्यवसायिकांनी आपला व्यवसाय स्थानिक पातळीवर न करता ऑनलाइन मार्केटिंगचा आधार घेऊन व्यवसाय वाढविण्याचा अधिक प्रयत्न करावा. युट्यूब  मार्केटिंगच्या माध्यमातून व्यवसाय आणखी कसा वाढवता येईल याचा सविस्तर वृतांत या पुस्तकात मांडला आहे. युट्यूबमुळे आपला व्यवसाय दिवसाला शेकडो, हजारो लोकांपर्यंत पोहोचवू शकता. व्हिडीओ कसा तयार करावा यापासून तो  युट्यूबवर अपलोड कसा करावा आणि युट्यूबच्या माध्यमातून पैसे कसे कमवावे,  याची संपूर्ण माहिती या ईबूकमध्ये दिली आहे. त्यामुळे नवीन व्यावसायिकांना या  ईबूकचे मार्गदर्शन फार मोलाचे ठरणार आहे.

माझे हे ईबूक आपल्याला कसे वाटले, ते मला कमेंटमध्ये लिहून कळवा आणि माझ्या ईबूकला यथेच्च रेटिंग द्या.   

धन्यवाद !

रविंद्र वि. नागांवकर

लेखक